បទល្មើសនេសាទបំផ្លាញធនធានមច្ឆជាតិកំពុងរាលដាលនៅតំបន់អន្លង់សំណ ស្រុកជីក្រែង ខេត្តសៀមរាប
19-August-2016 | ដោយ មែន កំសត់
ប្រជានេសាទជាលក្ខណៈគ្រួសារនៅតំបន់បឹងទន្លេសាប នៃឃុំអន្លង់សំណ ស្រុកជីក្រែង ខេត្តសៀមរាប បានឲ្យដឹងថានៅក្នុងរដូវបិទនេសាទនេះ ក្នុងមូលដ្ឋានរបស់ពួកគាត់កំពុងកើតមានបទល្មើសនេសាទប្រើឧបករណ៍ខុសច្បាប់ចាប់កូនត្រីល្អិតៗយ៉ាងមហន្តរាយ។ ប្រភពបានឲ្យដឹងទៀតថា ការដែលបទល្មើសកើតឡើងយ៉ាងអនាធិបតេយ្យ គឺមានការឃុបឃិតគ្នារវាងក្រុមជនល្មើស និងសមត្ថកិច្ចពុករលួយ ជាពិសេសមន្ត្រីរដ្ឋបាលជលផល ដែលគិតគូរតែរឿងផលប្រយោជន៍ផ្ទាល់ខ្លួន។ បញ្ហានេះនាយខណ្ឌរដ្ឋបាលជលផលខេត្តសៀមរាប លោក ព្រិន្ទ សាវិន មិនគួរបណ្ដែតបណ្ដោយតទៅទៀតទេ ហើយគួរចាត់វិធានការទប់ស្កាត់បទល្មើសនេសាទក្នុងឃុំអន្លង់សំណ ស្រុកជីក្រែង ប្រកបដោយប្រសិទ្ធភាព។
តាមការអះអាងរបស់ប្រជានេសាទនៅឃុំអន្លង់សំណ បានឲ្យដឹងថា បទល្មើសនេសាទប្រើឆ្នុកភ្លើង និងរបាំងស្បែមុងក្រឡាញឹក ដើម្បីចាប់កូនត្រីល្អិតយកទៅធ្វើចំណីត្រីឆ្ដោឬចំណីក្រពើ កំពុងកើតឡើងយ៉ាងអនាធិបតេយ្យ។ ប្រជាសហគមន៍នេសាទជាលក្ខណៈគ្រួសារនៅតំបន់បឹងទន្លេសាបនៃឃុំអន្លង់សំណ បានឲ្យដឹងថា ក្នុងខណៈដែលបទល្មើសនេសាទប្រើឧបករណ៍ខុសច្បាប់កើតឡើងយ៉ាងពេញបន្ទុកនោះ គឺលោក ញឹម ស៊ីវ័ន្ត នាយសង្កាត់រដ្ឋបាលជលផលអន្លង់សំណ ធ្វើមិនដឹងមិនឮអ្វីទាំងអស់ ហើយសម្ងំទទួលផលប្រយោជន៍យ៉ាងសុខស្រួល។ ក្រុមអ្នកនេសាទប្រើឆ្នុកភ្លើងចាប់កូនត្រីល្អិតៗភាគច្រើនគឺពលរដ្ឋដែលរស់នៅភូមិមាត់ខ្លា ឃុំអន្លង់សំណ ក្នុងនោះជនជាតិយួនកំពុងធ្វើសកម្មភាពដោយគ្មានញញើតអ្វីឡើយ។
ប្រភពពីប្រជានេសាទនៅឃុំអន្លង់សំណ ស្រុកជីក្រែង ខេត្តសៀមរាប បានឲ្យដឹងថា បទល្មើសដាក់ឆ្នុកដោយប្រើអំពូលភ្លើងសម្រាប់ទាក់ទាញត្រីឲ្យមកស៊ីសត្វល្អិតធ្លាក់ក្នុងទឹកនោះ គឺក្រុមជនល្មើសអាចចាប់ត្រីល្អិតៗដឹកជញ្ជូនយកទៅលក់នៅឃុំពាមបាង ស្រុកស្ទោង ខេត្តកំពង់ធំ ដោយគ្មានការរំខានពីសមត្ថកិច្ចពាក់ព័ន្ធឡើយ។ ប្រជានេសាទក្នុងឃុំអន្លង់សំណ បានឲ្យដឹងថាពួកគាត់រាយការណ៍ទៅមន្ត្រីអាជ្ញាធរមូលដ្ឋាន និងមន្ត្រីរដ្ឋបាលជលផលនៅពេលដែលកើតមានបទល្មើសប្រើឧបករណ៍ខុសច្បាប់ ក៏ប៉ុន្តែមន្ត្រីអាជ្ញាធរមូលដ្ឋាន និងមន្ត្រីរដ្ឋបាលជលផល ជាពិសេសលោក ញឹម ស៊ីវ័ន្ត នាយសង្កាត់រដ្ឋបាលជលផលអន្លង់សំណ ធ្វើជាដេកលក់រហូត។ ដូច្នេះលោក អេង ជាសាន ដែលជាអគ្គនាយករដ្ឋបាលជលផល គួរពិនិត្យមើលអំពើពុករលួយ និងភាពអសកម្មរបស់មន្ត្រីរដ្ឋបាលជលផលក្នុងស្រុកជីក្រែង ខេត្តសៀមរាជាបន្ទាន់ ព្រោះបច្ចុប្បន្នពួកគេមិនបង្ក្រាបបទល្មើសនេសាទប្រើឧបករណ៍ខុសច្បាប់យ៉ាងរាលដាលនោះឡើយ៕
ចំនួនអ្នកទស្សនា
- ថ្ងៃនេះ7181
- ម្សិលមិញ11441
- សប្តាហ៍នេះ37011
- ខែនេះ152161
- ឆ្នាំនេះ152161
- សរុប20594617